'Benn warc'hoazh adalek 10e e vo dalc'het eil devezh kampionad rummad kentañ melldroad war gador ruilh. Gant Brest Electro Foot 'vo degemeret ar skipailhoù gwellañ a zo 'ba kampionad Frañs en ur sal nevez flamm: sal Penn ar Straed a zo e karter Europa. Pempzektez 'zo 'oa lañset ar bloavezh 2014 e Maucresson, e-kichen Pariz. Gant ar vrestiz 'zo bet gounezet daou vatch ha graet rampo div wech. Kroget mat a walc'h ar bloavezh neuze, gounezet 'zo 8 poent dija. Warc'hoazh 'klasko paotred Electro Foot Brest gounit poentoù ouzhpenn. 'Vo ket aes. Skipailhoù barrek tre 'vo 'bar vro, setu 'pezh 'neus displeget Erwan Conq, kabiten ar Vrestiz ha c'hoarier gwellañ kampionad Frañs rummad kentañ. Ur pennad gant Erwan Blanchard.