Ar beure mañ 'oa kinniget ar steuñv da genderc'hel gant lazhtioù Gad gant ar CECAB. 'Bar steuñv 'zo bet kinniget dirak al lez-varn koñvers e Roazhon 'zo anv da serriñ al lazhti moc'h 'zo 'ba Lambaol Gwimilio lec'h ma 'zo 850 a dud o labourat. N'eo klok ar steuñv se 'zo kaoz 'zo roet d'ar Cecab un tamm amzer evit e welaat. D'an 9 a viz Here e tremeno ar renerien dirak al lez-varn koñvers adarre. Bremañ 'yaio Prestor, lodennour Gad, eus tu ar Cecab. Embannet 'neus ar C'hoop 'vo kaset 26 000 porc'hell da& Jossilin. Abred beure 'oa en emgavet ur bouchad implijidi eus al lazhti 'zo 'ba Lambaol. 200 anezho 'zo bet o vanifestiñ 'ba Roazhon a-enep ar steuñv kinniget gant ar Cecab, ar re all 'zo chomet 'ba Bro-Leon: ganto 'zo bet lakaet tan 'bar pneuioù, stanket kroazhioù-hent kostez Landivizio. Dipitet kaer an holl o welout ur stal, 'yae mat en-dro pevar bloaz 'zo, o vont da netra. Tud 'zo o labourat eno abaoe muioc'h 'vit tregont vloaz. Hervé, bet o labourat 'ba ti Gad 'ba Lambaol 'pad pell 'oa deuet ar beure mañ dirak al lazhti 'vit manifestiñ. Emañ ouzh mikro Erwan Blanchard.