Kinniget eo bet ar c'heleier get Aodren Trehin

Votet eo bet ur mennad disfiz get ur muianiver

Votet eo bet ur mennad disfiz get ur muianiver er vodadeg vroadel da c’houde an nav ha daou ugent pik 3 implijet get Michel Barnier evit kadarnaat budjed ar surentez sokial hep vot. Tangi Kazumba a zo eil-kannad LFI pastell-vro Gwengamp e daouad get Murielle Leprvaud, ar gannadez. Votet eo bet geti ar mennad disfiz. Displegañ a ra Tangi Kazumba en hec'h anv, perak ar choaz-mañ. Selaouomp ivez doc’h ar c’hannad nemetoñ a zo brezhonegour. Paul Molac a zo kannad pastell-vro Ploermel er Morbihan. Emañ er strollad LIOT, Frankizoù ha Tiriadoù (Libertés et Territoires) er vodadeg vroadel. Er c’hontrol da Muriel Leprvaud, n’en deus ket votet ar mennad disfiz.

Ouzhpenn da Barnier hag ar gouarnamant, Macron a c’hellehe reiñ ivez e zilez met laret en deus dija n’eo ket e soñj en ober. Klevet eo bet anezhoñ da 8e evit ur brezegenn ofisiel er skinwel.. Ar wezh-mañ e faota dezhoñ erlec’hiañ fonnapl-tre Michel Barnier, ha pas lezel ar vro hep kentañ ministr èl m’en deus graet e-pad an hañv.

Un devezh manifestadegoù ha harzoù labour a zo bet dec’h er vro a-bezh evit difenn ar servijoù publik.

Bodet e oa 8000 den e Naoned, ouzhpenn 4000 e Roazhon, hag e Brest e oent 3000 da nebeutañ er straedoù. E Bro-C’hall a-bezh e oant 200 000 hervez ar CGT ha 130 000 hervez ar polis. Taget eo ar servijoù publik gant ar bolitikerezhioù budjed zo lakaet e plas abaoe blezadoù. Arboell arc’hant e kef ar Stad a zo goulennet get ar gouarnamant. Embannet e oa bet e vehe digresket an niver a gelennourion a 4000 plas a-benn miz Gwengoloñ 2025. Embannet ivez e vehe lakaet 3 devezh « carence » d’ar gargidi pa chomont klañv, da laret eo ne vehent ket paeet e-keit se.

Da glevet ivez er c'heleier :

-Tabutoù a zo e Pondi a ziàr ar fiñvusted ha dreist-holl an tren!

-E Flandrez, e Belgia, ez eus bet serret pe gourdrouzet da vout serret magourioù gallegour.