Kazi sur ho peus bet etre ho taouarn - ur wezh da vihanañ ! - unan eus ar 500 oberenn bet embannet gant TES dindan 30 bloavezhiad labour o sevel hag o skignañ dafar pedagogel e brezhoneg !

« Enora, Enora, poent eo mont da gousket bremañ »… Soñj hoc’h eus marteze eus al levr kanaouennoù evit ar vugale bet embannet e miz Meurzh 1994 lakomp !

E Ti ar Vro Sant-Brieg disadorn e oa bet komzet eus istor TES evel-just met un digarez eo bet deiz-ha-bloaz an ti-embann ivez da gas ar preder war-raok asambles gant oberourien an embann e brezhoneg. Un daol-grenn war "roll an embann evit treuzkas ar yezh ha krouiñ un endro yezhel" a oa bet diouzh ar beure. War forzhik traoù e oa bet lakaet ar gaoz, en o-zouesk ar programm treiñ lennegel douget gant Ofis Publik ar Brezhoneg ha Rannvro Breizh. Hiroc'h gant Delphine ar Bras, renerez TES, ha Fulup Jakez, rener Ofis Publik ar Brezhoneg.

Ha nevezenti a vo gant an ti-embann a-benn nebeut. Div lec’hienn Web en do TES : an eil a vo evit ar produioù moullet hag eben a vo ur savenn liesvedia anvet MediaTes ma vo kavet an dafar niverel. Ha danvez nevez a vo da heul ar cheñchamantoù-se !

Reportaj gant Tomaz Laken