Ur c'hant bennag a dud a oa en em vodet abred ar mintin-mañ dirak al lise Colbert en Oriant. Kelennerien ha sindikalourien evit ar pep brasañ anezho, a oa o c'hortoz Nicole Belloubet, Ministrez an Deskadurezh Stad, a oa da weladenniñ al lise-se hiziv. Fellout a rae dezhe diskouez o enebiezh ouzh reform « chok ar gouiziegezioù » ha reform al liseoù micherel. E touez ar vanifesterien e oa ivez ur bodad tud eus Diwan ha prezidant ar rouedad. Chomet eo direspont evit poent al lizher o doa kaset d'an deskadurezh Stad gant ar strollad Evit ma vevo hor yezhoù. Goulenn a reont e c'hellfe ar skolajidi kaout sujedoù ar breved e brezhoneg, hag al liseidi tremen an arnodennoù skiantel e brezhoneg evit ar vachelouriezh. Selaouomp Trsitan Nedeleg, eus kuzul skoazell Diwan Rianteg, a oa war al lec'h ar mintin-mañ.

Embannet he deus Nicole Belloubet he rofe he respont ar sizhun o tont diwar-benn sujedoù arnodennoù ar breved e brezhoneg.

Ha benn warc'hoaz e vo aozet ur vanifestadeg all gant ar rouedad skolioù Diwan, e Perroz-Gireg, dirak an ti-kêr da 11e30 mintin. Rak ne fell ket d'ar strollad ar Genkiz, a zoug ar raktres digeriñ un eil skolaj Diwan e Aodoù an Arvor, e vefe dilezet digoradur ur skolaj Diwan nevez e Perroz gant ar strollegezhioù lec'hel.