Warlene e oa bet lakaet un toullad mat a gumunioù dindan ar statud « takad tenn » e Breizh. Met ar muzul-se n'eo ket trawalc'h da herzel enkadenn al lojeiz evit an UDB. Hag evit gwelet penaos e vefe degemeret diskoulmoù nevez gant ar vretoned ha bretonezed, evel ar Statud annezad, en deus ar strollad koumanantet ur sontadeg digant an Ifop da destiñ o mennozhioù. Muioc'h a ditouroù diouzhtu gant Nil Caouissin, mouezh aotreet ar strollad.

Klevet ho peus Nil Caouissin, a oa bet aterset gant Metig Jakez-Vargas. Diskouez a ra sontadeg an UDB ez a al lodenn vrasañ eus ar boblañs e Breizh a-du gant o c'hinnigoù, met evit poent n'en deus ket ar rannvro ar galloudoù evit reoliañ ar feurmoù AirBnB, an eiltiez pe c'hoazh lakaat e plas ur statud annezad hep na vefe muioc'h a emrenerezh gant ar Rannvro.