Gwerz Denez, dastumad gwerzioù Denez Prigent

Kaner eo Denez Prigent abaoe ouzhpenn 30 vloaz ha savet en deus gwerzioù a c’heller selaou en e zaouzek pladenn pe e-pad e sonadegoù, met ne oant ket bet dastumet c'hoazh. Setu goude bloavezhioù a labour eo bet embannet Gwerz Denez, un dastumad 136 gwerz en ul levr. Deuet e oa ar c’haner da ginnig e levr e Kouant ar jakobined e Roazhon hag aterset e oa bet gant Anton Burel.

Kendalc'h ar gelennerien ha kelennerezed jedoniezh

950 kelenner.ez deus Breizh, Bro C’hall met ivez deus Europa a gemer perzh er c'hendalc'h-se, betek dimerc'her. A bep seurt darvoudoù a vo aozet ‘pad an devezhioù-mañ war ar c’helenn matematikoù dre-vras met ivez atalieroù, tabutoù ha gweladennoù. Julie Verscheldem, prezidantez rann Breizh an APMEP hag Aziliz Cornu kelennerez war ar matematikoù e Skolaj Anna Vreizh e Roazhon a lâr deomp hiroc’h diwar-benn ar c'hendalc'h-se ouzh mikro Anton Burel.

Holl reportajoù Keleier ar vro da selaou AZE.

Ha da glevout ivez er c'heleier :

- Disemglev a zo bet etre ar broioù arab ha broioù ar c'hornôg e kendalc'h ar peoc'h en Egipt diwar-benn ar brezel israelo-palestinat

- Kenderc'hel a ra ar brezel e Ukrenia war ar memes-tro

- Aet eo ar maout gant an tu-dehoù kalet en dilennadegoù kannaded e Suis

- 10 000 a dud o deus manifestet a-enep d'an hent-tizh A69 disadorn

- Su-Afrika a c'hoario a-enep da Zeland-Nevez e Kib ar Bed rugby ar baotred

Keleier kinniget gant Metig Jakez-Vargas