Dipitet 'oa Yvette Jobard gant diviz barnerien Brest da gondaoniñ, dec'h, kabiten ar vag Ocean Jasper da bevar bloavezh a doull-bac'h hag e skoazeller da tri bloavezh: hepken. N'int ket aotret da gas bagoù bras ken. Met dreistholl, eus e du eo dizalc'het, relaxet, paramantour ar vag. Met n'eo ket didamallet: dav 'vo dezhañ paeañ, asamble gant kabiten ar vag hag e skoazeller,  60 000 euro da Yvette Jobard ha d'he zer verc'h, mui 6000 uro da bep martolod 'oa 'bourzh ar Sokalique.  Evit intañvez Bernard Jobard 'oa aet da strad gant e vag, ar Sokalique, e miz Eost 2007, n'eo ket uhel ar c'hastiz. Skoet 'oa ar Sokalique gant an Ocean Jasper hag aet foñs ar mor. Kendalc'het 'noa a Ocean Jasper gant he hent hep dont da sikour ar vartoloded breton. N'eo ket echu an afer 'peogwir 'vo barnet ar c'holl ekonomik gant lez-varn koñvers Brest d'an 22 a viz C'hwevrer.