Ur c'hresk eksponantel a zo gant ar stal Amazon e bro C'hall. E kerzh an daou viz tremenet nemetken zo bet digoret 5 ajañs gant ar stal etrevroadel kenwerzh en linenn, hervez ar gazetenn Reporterre. Hag emañ er mare-mañ stal ar miliardour Jeff Bezos o klask lakaat e grabonoù war Vreizh. Un vagajenn ramzel a zo da vezañ savet e kumun Montbert e kichen an Naoned, hag un ajañs degasadennoù e Brieg e kichen Kemper. Rannet eo an dud er vro war ar sujed-se. Lod a lâr e vo degaset labour gant Amazon. Lod all a zo spontet gant doareoù ar stal, o vezañ noazius evit ar goñversanted lec'hel, evit an implijoù, evit an endro, evit an tailhoù, evit ar sevenadur, hag evit an demokratelezh zoken. Evel m'eo boaziet d'en ober, en eus Amazon prenet an douaroù da sevel an ajañs hep reiñ e anv. Kontet vez domp gant Bernez Rest, ezel deus ar strollad « Stop Amazon 29 », penaos eo tremenet an traoù... Emañ deus mikro Tunvezh Gwlagen-Grandjean. Met gwerzet eo an douaroù dija. Ur strollad enep Amazon a zo en em savet er sizhunvezhioù-mañ, a c'houlenn ma vo torret ar werz-se. Disul, neuze, e vez pedet an dud enep ar raktres da vont war tachenn ar werz e Brieg, a-benn plantañ gwez warni. A-raog fin ar miz emañ maer kumun Brieg da reiñ d'ar stal an aotrez sevel-ti.