Ur c'hlas prepa lizhiri 'ba Kerichen, 'ba Brest, a c'hallfe serriñ. Raktres Rektor Akademiezh Roazhon eo evit an distro skol 2021... Ar pal a vefe digeriñ ur c'hlas prepa skiantoù 'ba Roazhon.. evit prientiñ ar skolioù urzhiataerezh ha matematikoù. Abalamour d'ar raktres-mañ e tremenfe eus tro 80 da 48 studier evit ar c'hentañ bloavez prepa lizhiri. Fuloret eo ar gelennerien hag ar studierien. Ar raktres zo fall evit Anna Richard. Studieriez eo bet 'ba prepa lizhiri Kerichen pemp bloaz 'zo. Un toullad displegadennoù ganti, deus mikro Yuna Cojean. Ur sinadeg « Sauvons la prépa lettres du lycée La Perouse-Kerichen » zo bet lakaet e plas. Ouzhpenn 2 500 sinadur 'zo. Ul lizher zo bet kaset d'ar rektor ivez, diwar youl ar studierien gozh.