'Ba Breizh 'zo bet 22 000 den war straedoù an Naoned, un tamm muioc'h 'vit ar 5 a viz Kerdu; 18 000 manifestour 'zo bet 'ba Roazhon, 12 000 'ba Brest, etre 10 hag 8000 'ba Sant-Nazer, 6000 'ba Sant-Brieg, an Oriant ha Kemper; 5000 'ba Gwened; etre 2000 ha 3000 a dud 'ba Montroulez ha 'ba Lannuon; 1300 'ba Kemperle; 700 'ba Dinan pe c'hoazh etre 500 ha 300 'ba Gwengamp. A bep seurt tud 'gaver war ar manifestadegoù se 'pe 'vefe kelennerien, tud war o leve a fell dezho 'vef dalc'het ur sistem leve da bep hini gellout bevañ en ur mod dereat; implijidi an SNCF, an Ospitalioù ivez; studierien 'oa un nebeut anezho, ivez, 'ba Montroulez o vanifestiñ. Albert Daniel 'zo war al leve abaoe un neubeut bloavezhioù goude bout bet labouret 'giz psikolog. Ezel eo eus ar CFDT. Roet 'neus e soñj deomp war al leve.