E fin miz Meurzh voe bet un devezh stourm gant labourerien ar magourioù. Nec'het int gant ur raktres 'n eus ar gouarnamant da cheñch an doareoù da zegemer ar c'hrouadurioù. Perzh eo deus al lezenn ESSOC da simplaat ar velestradurezh. Sañset eo an destenn tremen ac'hann an hañv, dre sistem an ordonañsoù. An devezh harz-labour d'an 28 a viz Meurzh, bet galvet gant sindikadoù ar micherioù diwall bugale bihan, a zo bet heuliet mat. Ur souezh, pa n'eo ket un endro labour ma vezer boaz da stourm evit ar gwirioù sokial. Evit Gregor Mazo ne oa nemet an eil gwezh dezhañ gwelet an dra-se dindan 13 bloavezh labour. Rener ar gevredigezh Divskouarn, a vrud ar magourioù e brezhoneg, a gont penaos voe bet ul luskad braz dek vloaz 'zo dija. Hag eo en em savet en dro ar strollad « Pas de bébé à la consigne », ganet 10 vloaz 'zo evit difenn ar micherioù d'ober war dro ar c'hrouadurioù. Goulennet 'n eus bezañ klevet gant ar vinistrelezh, hag e c'hellfe bezañ galvet da stourm en dro ma gav dezho n'int ket bet selaouet.