Ur pempet radio kevredigezhiel e brezhoneg a vo e Breizh : Radio Naoned a vo he anv ! Diaes tre eo kaout frekañsennoù nevez evit digerriñ pe brasaat ur radio. Ar bloaz-mañ eo posubl e bro Naoned peogwir vez diorreet an RNT eno, ar radio niverel douarel. An RND a zo evit ar radio ar pezh eo an TNT evit ar skinwel. Dimerc'her zo bet roet listennad ar raktresoù radio degemeret gant ar CSA, kuzul meur ar c'hleweled. Hag en o zouezh 'zo deus Radio Naoned. Ar raktres radio e brezhoneg a zo bet lañset dibaoe un nebeut mizioù 'zo bremañ gant Radio Kerne. Morgan Bramoulle a zo ken-renourezh ar radio. Displegiñ a ra da Dunvezh Wlagen-Grandjean perag n'eo ket ur skipailhad tud Naoned a zo bet a orin ar raktres radio nevez.