Abaoe un toullad blaovezhioù eo arru stenn an traoù en IUFM brezhoneg. Koazhet eo ar c'helenn brezhonek tamm ha tamm, ha disteraet ar plasoù kelennerien. Betek 2008 'oa tri ensavadur disheñvel o kenlabourat, an IUFM e S. Brieg, Skol-veur Brest ha skol-veur Roazon 2, hag e oa bet divizet mutualizañ an traoù evit kaout ul lec'h dereat ha propr da stummañ an dud, koulz ar PE hag ar PLC, da lâret eo ar skolaerien deus an eil tu hag ar skolaerien eil derez deus egile. Herve Bihan zo e karg deus rann ar brezhoneg e skol-veur Roazon 2. Lâret 'ra deomp penaos 'veze kaset an traoù betek-hen ha penaos ez eont da dreiñ hiviziken, deus mikro Tudual Karluer.