A-c'houde dilun e tassona bombardoù ag ar bed a-bezh e kornad Klegereg en arbenn ag ar fest « Bombardes et Compagnies », savet get ar gevredigezh « En Arwen ». Ar blez-mañ emañ bet pedet tud a vro Marok, a Gatalunia, ag ar Gwadeloup, hag ag ar Vietnam. An digarez evit ar sonerion da genlabourat ha da liammiñ sonerezh o bro ha sonerezh a Vreizh. Mikael Guillaume a veva er Vietnam a-c'houde meur a vlez, emañ iwez é penn kevredigezh « Bretoned ar Vietnam ». Ha daet eo da soniñ get ar strollad Lang du. Yaelle ar Mouel neus goulennet getoñ penaos oa implijet ar vombard du-hont.