Achu eo "ar sizhun european war al lostajoù". Ar pal evit an holl kevradoù lec'hel : lakaat da zigreskiñ pouezh ha niver al lostajoù lakaet er poubellennoù pe kaset d'al lastezerezh. E Penn ar Bed, 'neus lakaet ur steunv departamant ar pal da dremen deus ouzhpenn 715 kg dre zen bep bloaz betek 650 kg, e 2018. Evit dont a-benn da dizhout seurt palioù 'vefe tu klask reiñ un eil buhez d'an traoù kozh. Setu da skouer pal an emglev oa bet sinet etre Emmaüs ha "Kemper Kumuniezh", en nevez-amzer tremenet. Dibaoe 'vez gwelet Karr-samm Emmaüs div wech ar miz en antre al lastezerezh 'ba Kemper. Disadorn, en un doare dreist-ordinal evit lidañ "ar sizhun european diwar benn an digresk lostajoù" oa ar c'hamion ivez war al lec'h. Ha Gabriel Bouroullec, un den a volontez vat evit Emmaüs, laouen da zegemer an dud.