E 1986 en doa embannet Paul Simon e nawved albom solo, Graceland, levesonet ged ar musik a Afrika-ar-Sud. Ugent vlez àr-lerh e save studierion e musikoloji ba Columbia (NY) ar strollad Vampire Weekend, ar memes liw afrikan gete. Ezra Koenig (kan, kitar), Rostam Batmanglij (klawier), Chris Baio (kitarboud) ha Chris Tomson (batri) doa embannet o albom kentañ e 2008, ha dija o doa savet ur morad faned. Ged Contra e 2010 hag e dubow, "White sky" ha "Horchata", e oant bet anavet er bed a-bezh. E 2013 e kennigant Modern vampires of the city, ur bladenn binwikoh hoazh, pas ken anad eid raog, mes gwirion ha don. N'o deus ket ankouaet leveson Paul Simon, na re King Sunny Adé pe Brenda Fassie, adkavoud a ramp perkuiow a Afrik ba "Unbelievers", mes azwet o deus Vampire Weekend, hag uhelaad a rant hor speredow dre ar soniow arall o deus savet. Ged "Diane young" ha "Finger back" e tañsamp en-dro, mes dre vras ema difonn an tempo, èl ba "Obvious bicycle", a zigora an disk, a ziskoueza an hent. Lâret ew bet lies ema re bropr o son (leveson o studiow sur'walh), mes kempoueset vez ged posiow melkonius hag aergerliow un tammig teñwelloh barzh an trede albom-mañ, kasset da-benn ged ar produer a Galiforni Ariel Rechtshaid. Ged o enrolladennow kent o doa 'n em lañset Vampire Weekend. Amañ e komañsant da gavoud o son da vad, santet vez a-benn penaos ema unvan, kreñv, solud. Ur basenn vras. PAUL SIMON "You can call me Al" in Graceland (1986 . Warner Bros) SUUNS "2020" in Images du futur (2013 . Secretly Canadian) CAYUCAS "Cayucos" in Bigfoot (2013 . Secretly Canadian) HALF MOON RUN "Full circle" in Dark eyes (2012 . Indica) VAMPIRE WEEKEND "Diane young" in Modern vampires of the city (2013 . XL Recordings) TAKEN BY TREES "Dreams" in Other words (2012 . Secretly Canadian) Liammow : > Vampire Weekend ha > Suuns > Cayucas > Paul Simon > Half Moon Run > Taken By Trees