Kinniget eo bet an doereioù get Aodren Trehin ar mintin-mañ.

E Argol he deus Anna Jouin ur vagerezh gwez-frouezh peizant, abaoe 2023, anvet « Gwez » just a-walc'h !

600 gwezenn a vo gwerzhet geti ar blez-mañ : gwez avaloù, pêr, kerez, pechez, kastrilhez... Pep hini a gavay e lod. Hag emañ mare ar plantañ é tostaat, emezi. Mard oc'h dedennet da ouiet hiroc'h àr ar gwez a gaver e magerezh gwez-frouezh Anna Jouin pe ma faota deoc'h prenañ unan zoken, e c'hellit kaouit ur yoc’h titouroù dre he lec'hienn internet « pepinièregwez.fr ». Hag adalek miz An Azvent, miz Kerzu e vo gwerzhet gwez ar c'houlzad geti.

Ur pennad-kaoz get Metig Jakez-Vargas.

N'eo ket achiv an adlodennañ pe ar remembrement e Breizh avat : kalz kleuzioù a vez freuzet du-mañ du-hont atav, kilometradoù bep plez.

Hag an dra-se ne blija ket d'an holl ! Evit enebiñ doc’h an distrujoù-se 'zo bet krouet meur a strollad e Penn-ar-Bed hag e Aodoù-an-Arvor, « Kleuzioù » o anv. Unan ‘zo bet krouet ur miz 'zo e Boneur e Menez Are. Kar er barrez-se n'eus ket 'met ul labourer-douar ken ha kleuzioù a vez foeltret geton. Evit gwareziñ ar re a zo chomet en o sav eo bet krouet ar strollad « Kleuzioù Boneur ». Selaouomp Gérard Gwenn, unan deus ar re o deus savet ar stroll.

Un atersadenn get Benjamin Bouard.

Da glevet ivez er c'heleier:

-Klemm en deus savet Jordan Bardella a-enep da X evit « implij dielloù faos » da geñver enklask Mediapart.

-Harz-labour hollek a vo ar 17 dimeurzh é tonet.

-Anvioù tud brudet ag an tu kleiz a zo bet kavet e ti Kevin Tessier, paotr ar gwalldaol e Trappes ha La Verrière.

-Ul lodenn a lenn Jugon a vo goulliet evit pourveziñ ar stankell dour mat da evet e Pleven.

-Lod 'zo a-enep d'ar raktres brasaat aquarium Sant-Maloù.

-Doereioù a Hent ar Rhum: Dec’h eo arriv Boris Herrmann en 2vet plas àr podium ar bagoù Imoca, hag Élodie Bonafous en 3vet plas. Damien Seguin, er 1añ plas er rummad Vintage Multi.