Keleier embannet ar beure-mañ gant Tomaz Laquaine

Miret anvioù-lec'hioù brezhonek ar vro, skwer Gwimaeg

War digarez un emvod kuzul-kêr e miz Ebrel e oa bet roet da c’houzout ar raktres envel ha niverenniñ ruioù, bilajennoù ha gwinodennoù ar gomun. Al lezenn « 3DS » bet votet e 2022 a redia ar parrouzioù da gas ur seurt labour da benn. Evit ar c’humunioù bihanoc’h evit 2000 a annezidi eo lakaet an termen d’ar 1añ a viz Even 2024. Ar pal zo aezetaat labour al livrerien, ar fakteurien hag ar sikourioù… Met e meur a lec’h eo bet graet an traoù diwar-goust glad an anvioù-lec’hioù brezhonek orin. E Gwimaeg bepred e voint miret ha klokaet gant niverennoù da zisheñvelaat ar chomlec’hioù. Ur bodad koñsailherien zo bet karget da renabliñ an anvioù-lec’hioù. Pedet e oa bet gante Bernard Kabon, bet maer Gwimaeg, ha Dominig Bourjes, bet koñsailherez.

Ur pennad-kaoz gant Tomaz Laken

30 vloaz Mouezh Paotred Breizh !

Ur c’haer a zeiz-ha-bloaz oa bet lidet e-pad « pont » hir Yaou Bask ! Hini Mouezh Paotred Breizh. 30 vloaz zo e oa bet savet al laz-kanañ gwazed. Hag ouzhpenn 400 sonadeg zo bet graet gante abaoe. Da lidañ an traoù war an ton bras e oa bet pedet 5 strollad all da gemer perzh er gouel ha da ginnig d’an dud sonadegoù betek disadorn. Tost da gant pevar-ugent arzour zo bet o c’hoari da geñver an deiz-ha-bloaz mar plij ! Digwener e oa bet ur sonadeg e iliz Poullaouen gant laz-kanañ Paotred Bro-Bagan ha Mouezh Paotred Breizh. Un digarez da c’houlennata kanerien eus ar strolladoù-se, Visant Abaziou ha Yann-Bêr Premel hag a zo eñ bet 20 vloaz o kanañ gant Paotred Breizh ha bet ivez e-mesk krouerien al laz-kanañ. Emaint o vont da zisplegañ deoc’h penaos e oa bet savet diwar atiz mignoned eus Bro-Gembre.

Ur pennad-kaoz gant Tomaz Laken

Da selaou ouzhpenn er c'heleier-mañ :

- Argad an arme rus e hanternoz Kharkiv

- War washaat ec'h a an traoù c'hoazh e bandenn Gaza

- Manifestet zo gant ar faskourien e Pariz

 - 6000 a dud a-enep ar jigabasinoù er Puy-de-Dôme

- Aet ar maout gant ar sokialourien e votadegoù rannvro Katalonia

- Lid-kounaat ar sklaverezh en Naoned : manifestadeg a-enep ar C'HRA

- Berzh Herri Urrats er Vro-Vask

Selaouit ar reportajoù en o fezh AZE.