Skipailh Stade Plabennecois a vo war dachenn "La Bocca" e Cannes warc'hoazh da noz da-geñver krogad diwezhañ 16vet tro Kib Bro-C'hall. Chañsoù o deus al leoniz da adkavout War Raok Gwengamp ha Stad Roazhon en dro gentañ daoust m'eo start ar jeu. E memes live ha Plabenneg emañ an AS Cannes o c'hoari, da laret eo CFA (4re rummad). Met gant ur skipailh c'hoarierien hag a zo paeet evit c'hoari melldroad eo hini Cannes. Daoust da se eo gouest ar Blabennekiz da vezañ trec'h. Da-geñver an dro diwezhañ e oa aet ar maout ganto war dachenn Les Herbiers a zo plas uhelañ ar CFA. Soutenet e vo ar re wenn ha ruz gant ur strollad supporterien. En o zouez e vo Roger Treut, ezel eus komite renañ Stade Plabennecois. Dec'h e oa o prientiñ ar veaj dreistordinal mañ. Muioc'h a ditouroù ouzh mikro Erwan Blanchard.