Aotreet en deus prefed Liger-Atlantel d'ar c'hentañ a viz Gwengolo tremenet reiñ un aotre ispisial da geñver gwir an endro evit ma vefe savet ur greizenn melestradurel da vac'hañ divroidi e-kichen Naoned, anvet CRA e galleg, "centre de rétention administrative". An aotre da sevel ar savadur a oa bet roet dija e miz Eost, ha setu kroget ar chanter diouzhtu e miz Gwengolo. Ur greizenn bac'hañ 140 plas a zo raktreset e Reter Naoned, e-kichen an toull-bac'h. Disadorn e oa bet dalc'het un eil manifestadeg a-enep d'ar raktres-se. E mesk an dud a sav a-enep d'ar raktres emañ an UDB. Selaouomp sell Pierre-Emmannuel Marais, bet kuzulier-kêr e Naoned hag ezel eus an UDB...

Ouzh mikro Metig Jakez-Vargas e oa Pierre-Emmannuel Marais. Ur rekour a zo bet kaset gant meur a gevredigezh dirak lez-varn melestradurel Naoned. Ur c'hoad pevar hektar a zo bet diskaret dija evit labourioù chanter ar greizenn bac'hañ. Divizet e oa bet sevel seizh kreizenn a-seurt-se e Frañs gant Gerard Collomb e 2017, pa oa ministr an diabarzh, evit ma vefe 3000 plas bac'hañ e kreizennoù Frañs e 2027.