Diriaou e oa bet roet disoc'h ur varnadenn gortozet e bed ar c'hevredigezhioù brezhonek. Kondaonet eo bet Florian Mehat, 39 bloaz, eus an Naoned, da bevar miz toull-bac'h ha 1600€ evit bezañ kunujennet hag embannet komzoù enepyuzhev ha gouennelour dre bellgomz en daou vloaz tremenet a-enep da dud Yezhoù ha Sevenadur hag an ACB, Ajañs Sevenadur Breizh e Naoned. Met ivez a-enep d'ur gopradez eus Ti ar vro Gwened, du he c'hroc'henn. Enora Molag eus Radio Bro Gwened he doa goulennet he santimant diganti da heul disoc'h ar prosez.

Gopradez Ti ar Vro a oa bet aterset gant Enora Molag, he doa heuliet ar prosez el lez-varn. Ar c'hevredigezhioù Frañs Palestin Kengred 44 hag Anef-Ferrer, a sikour an dud vresk, estrañjourien en o zouez, o doa resevet pellgomzadennoù kunujennus digant Florian Méhat ivez. Kondaonet e oa bet eñ dija evit torfedoù all e 2010 ha 2011 hag evit feulsterioù dre gomz ha gourdrouzoù lazhiñ. Toullbac'het e oa bet dija, ha lezet de vont nevez 'zo, e kreiz ar sizhun paset hepken.