Foar al levrioù e Gwengamp
A-hed an dibenn-sizhun, ‘ba Gwengamp, ‘zo bet gwerzhet kementadoù bras a levrioù eil-dorn. Marc’had-mat ar brizh : 4 euro ar c’hilo hepken. Kement-mañ a zo aozet gant kevredigezh skoazell skol Diwan Gwengamp, da rastellat ur sammad a arc’hant a vo implijet da baeañ an ATSEM ha da brenañ traoù evit ar vugale. Ha klev a rit eo dereat ar sammad a vez savet gant an oberenn-se, evel ma vo lâret diouzhtu gant Philippe Delo, a-berzh ar gevredigezh.
Ha n’eo ket achu foar al levrioù, pell a-se : d’an dibenn-sizhun-mañ e vo c’hoazh digoret dorioù sal Fañch Mitterand ‘ba kreiz-kêr Gwengamp, ha kement-all a vo d’an dibenn-sizhun warlerc’h.
