Kalzig a raktresoù sevel tourioù-avel ‘zo war’r stern ‘ba Kreiz-Breizh ar mare-mañ. En Groñvel, en Laruan, Logivi-Plougras, Plounevez-Moedeg, Boulvriag, Bulat Pestivien, Kerbêr, St Adrian… Evit lod ‘zo bet plantet ar peulioù dija, met raktresoù all ‘zo c’hoazh o talañ doc’h strolladoù annezidi ‘zo enep an efedoù fall a vo digaset gant an tourioù-avel, war al loened gouez, war ar dremmwel hag ar girzhier.

Bet eo bet Gwenvael Delanoe o toullañ kaoz gant Liliane Thoraval, ‘neus bet displeget dezhañ, a-berzh ar c’henstrollad Vent Debout, perak ‘oa a-enep a raktres plantañ 6 tour-avel bras nevez e kumun St Konan.

Hervez Aotrouniezh an Endro e oa, warlene, unnek parkad tourioù-avel er c’horn bro. Un enklask foran ‘zo bet da geñver ar raktres en St Konan, met ar gomiserez-enklasker a oa evit ma vefe nullet raktres an daou tour avel diwar ar c’hwec’h en holl a vo gwelet eus abati Koat Malhouenn, war gumun Kerbêr.

Hag ar mare-mañ ‘zo div enklask-foran all da geñver daou raktres parkad tourioù avel all : un en Plougonwaz (Plouguenast) ha Langast, un all war gumun Illifav. Kit da c’houlenn an titouroù en tiezh-kêr ma faota deoc’h lenn hiroc’h pe reiñ ho soñj war ar raktresoù-se.