Skoet eo bet ar stal D'istribilh e hanter noz Bro-Leon!
Chom a ra ur bern roudoù eus Ciaran ‘ba Breizh choazh ! Ur sizhun war lerc’h an tourmant emañ ar Vretoned o kempenn an distrujoù zo bet ‘bar vro. Bet eo an avelioù o c’hwezhañ etre 170 ha 200 kilometr d’an eur memestra. Stalioù zo bet foeltret ‘ban taol ha tapet fall zo bet embregerezhioù zo. Hini Gwenole Ollivier ‘ba Plouider zo bet skoet mat gant Ciaran. Nijet ‘neus kuit ul lodenn eus toenn an hangar lec’h ma bresa ar bier D’istribilh. Kenderc’hel ‘raio ar vreserezh bier D’istribilh da vont en dro sur dac’h… ‘Benn digwener ‘vo digoret ar stal d’ar pratikoù gellout dont da brenañ o feadra. Kontet ‘neus da Erwan Blanchard penaos eo bet foeltret e dafar labour e kerzh an nozvezh etre dimerc’her ha diriaou paseet.
