Savet he deus Morgan Large klemm abalamour ma oa bet diboulonet unan eus rodoù he c'harr-tan e fin ar sizhun baseet. Daou vloaz zo just e oa bet implijet ar memes doare da lakaat en arvar buhez kazetennerez Radio Kreiz Breizh a zo ivez e-mesk krouerien ar media enklask Splann ! E miz Kerdu 2022 e oa bet lezet a-gostez an enklask bet kroget d'ar c'houlz-se.

C'hoarvezout a ra an eil tagadenn-mañ e-mesk meur a hini all bet en deizioù ha mizioù tremenet a-enep tud hag a zifenn an endro. E miz Genver, lakomp, e oa bet taget feuls Paul François, al labourer-douar en doa lakaet kondaoniñ Monsanto un nebeud sizhunioù a-raok. Met ouzhpenn enebourien an agro-industriezh a vez taget. Tostaat a ra Morgan Large he zagadenn ouzh ar gourdrouzoù marv gouzañvet nevez zo gant kazetennerien ar Poher ha dilennidi Kallag. Ur feulster o tont eus an tu-dehoù pellañ hag a oa a-enep ar raktres Horizon da zegemer repuidi er gomun. Eizhtez zo a-hend-all e oa bet c'hwezhet tan e ti Yannick Morez, maer Sant-Brewenn e Liger-Atlantel. Eno zo bet raktreset degemer repuidi ivez.

Er beure-mañ e oa bodet kenlabourerien Morgan Large tro-dro dezhi e Gwengamp a-benn reiñ o santimant war an eil sabotaj-mañ. Selaouomp Kristen Falc'hon, eus skipailh Splann !, ha Morgan Large.

Pennad-kaoz gant Tomaz Laken

(Poltred gant Eric Legret)