Daoust m'emañ ar Stad o klask gwellaat mad ar skolidi hag ar skolaerien dre reformoù ar ministr Peillon, e chom treuzkompren da geñver divizoù 'zo. E skol-vamm Victor Hugo Douarnenez 'zo anv da lemel ar pevare klasad pa 'oa 104 bugel enskrivret e miz Gwengolo paseet. Niverus-mat e vefe neuze ar vugale e pep klas ha rankout a rafe ar skolaerez a gelenn er c'hlas skol-vamm-se mont gant ul live all. Ti-kêr Douarnenez a sav a-enep d'al lamadenn-se. 'n em vodet eo kerent ar vugale hag ar skolaerien bremaik dirak ar skol, goude un emgav gant dilennidi ar gêr. Ur sinadeg a zo o paouez bezañ embannet hag manifestiñ 'vo graet dirak ensellerezh akademiezh Kemper 'benn diriaoù kentañ. Yannig Poullazan, tad ur skoliad a Victor Hugo 'n eus roet e soñj da Gatell Uguen.