Dec'h e voe un devezh harzh-labour. Diwar c'halv 6 aozadur sindikel e oa diskennet ar gelennerien er straedoù, mez ivez ar studierien, al liseidi, ar glañvdiourien skol, pe c'hoazh kerent ar vugale. Evit ar vanifesterien, emañ ar skol en ur stad evel ma ne oa bet biskoaz, dre gaoz da enkadenn ar c'horonavirus, mez ivez da bolitikerezh ar gouarnamant. Ar skolidi a zo lakaet diaes tre en o labour, padal e vez lakaet pep tra war chouk ar gelennerien hag o deus ar santimant da vezañ dilezet. E Kemper a oa dreist-holl kelennerien ar c'hentañ derez o vanifestiñ. Laurence, Ghilaisne hag Aziliz a oa en o zouezh. Displegiñ a reont deus mikro Tunvezh Gwlagen-Grandjean petra 'n eus degaset anezho da vanifestiñ. Goulenn a ra neuze ar sindikadoù ma vo postet argant en Deskadurezh Stad, ha kresket goproù ar gelennerien. Gopr ar gelennerien yaouank e bro C'hall a zo a 7% izelloc'h eget keidenn hini broioù an OCDE. Ezhomm zo, hervez ar sindikadoù er c'hontrol, ma vo roet kalon d'an danvez kelennerien a-zeu, o reiñ talvoudegezh ar vicher.