Dibaoe dilun, kentañ a viz Genver, eo rediet an holl vugale ganet goude an deiziad-se da resevout 11 vaksin. Betekhen ne oa dav lakaat ar vrec'h dezho nemet evit tri kleñved. Un diviz gouarnamant Emmanuel Macron hag en eus graet un tammig reuz. Lod kerent a zo enep peogwir hervez klevet e c'hellfe degas kleñvedoù all grevus tre dre al louzoù a vez lakaet er vaksin. Lod all, evel medisined 'zo, a gav dezho e fall ober ur redi deus ar vaksin, peogwir e lak disfi e penn ar c'herent. Tunvezh Wlagen-Grandjean a zo aet da welet un tad, bet graet ar peadra evit ma ne vefe ket brec'hataet e vugel. Displegiñ a ra dezhi penaos vez graet evit mont e-maez al lezenn.