« Sevel », setu anv pladenn gentañ Laurie Guillou a vo embannet 'benn miz. Ne c'hortoze ket plach Konk-Kerne n efe an dastummadeg archant savet ganti dre ar rouedad degaset kement a wenneienn dindan ken nebeud a amzer. Ouzhpenn 170% deus ar sammad goulennet a zo bet rastellet dija, setu ma chello ar plach yaouank kas he huñvre da benn. Ur bladenn leun a santimantoù, awenet gant ar garantez hag ar vuhez o vont. « Sevel » a vo enni kanaouennoù e galleg, lod all e saozneg ha reoù all e brezhoneg. Laurie he deus skrivet lod pozioù, met barzhed brudet a gaver ivez, lod pozioù gant Youenn Gwernig pe Anjela Duval da skouer. Jean-Luc Roudaut hag e stal Brennig Productions a gas raktres ar bladenn da-benn. Deomp da chouzout hiroch diwar-benn « Sevel » gant Laurie Guillou. Emañ ouzh mikro Katell Uguen. Tu 'zo archantaouiñ « Sevel », pladenn gentañ Laurie Guillou, dre al lechienn Ulule.