Nav minutenn hag hanter-kant ! Setu an amzer 'vo lakaet evit ober Kemper-Brest pe Brest-Kemper gant an tren, adaleg kreiz 2014. Ur c'hart eur 'vo gounezet goude al labourioù 'vo kaset da benn e 2013 ha dreist-holl er c'hwec'h miz kentañ eus 2014. Labourioù bras graet gant ar "Réseau ferré de France" met paeet evit al lodenn brasañ - tost pevar ugent dregant - gant Departamant Penn ar Bed hag ar c'huzul rannvro Breizh. Ar chañter a gousto ker met graet eo evit padout 'pad pell ha sachañ un hanter muioc'h a dud en treñioù, n'eus displeget Gérard Lahellec, eil prezidant ar rannvro, e karg eus an transportoù.