Embannet eo bet ar c'heleier ar beure-mañ gant Erwan Blanchard

Difennet e vo pesketa an eoged 'ba Breizh e 2025

Keleier fall zo evit ar besketourien eoged ‘ba Breizh. Embannet eo nevez zo gant prefed ar rannvro ha komite merañ ar pesketa pesked a ya ha da ‘vo ket aotreet pesketa eoged ken adalek 2025... ‘pad ur bloaz da nebeutañ. Ral eo deuet an eoged ‘ba stêrioù Breizh m’eo istorel ha sevenadurel ar pesketa eoged. Evit pesketourien ar vro n’eo ket an diskoulm gwellañ serriñ ar pesketa. N’eo ket ‘ba Breizh ha war vord ar stêrioù emañ an dalc’h. Selaouomp Gael Le Moullec zo ezel eus AAPPMA Montroulez, kevredigezh ar besketourien. Emañ gant Erwan Blanchard.

Un atlas evit dizoloiñ ar bedoù faltaziek!

Emañ Nedeleg o tostaat ! Sur a walc’h emaoc’h o klask ur prof evit ho re nes ha setu Kuzul ar Brezhoneg n'eus embannet ar c’hatalog Nedeleg ! ‘vel bep bloaz, ar gevredigezh hag a vod darn vrasañ deus an tiez embann a embann levrioù e brezhoneg, a ginnig al levrioù zo bet embannet gante ‘pad ar bloaz. B’ar c’hatalog-mañ e c’hell an nen kavout un daou ugent bennak a levrioù… hag e mesk al levrioù ez eus bet ul levr n'eus graet trouz e bed al levrioù. Atlas ar bedoù faltaziek, setu ul levr hag a vod kartennoù deus bedoù ijinet gant skrivagnerien… Bed Tolkien, Pratchett pe c’hoazh Paolini gant an anvioù lec’h lakaet e brezhoneg evel-just. Al levr-mañ zo bet skrivet gant Jerom Olivry hag eo bet harpet gant tresadennoù Kristian Goindin… Jerom Olivry a ginnig deomp penaos eo bet savet al levr…

Ha da selaou ouzhpenn 'bar c'heleier:

• Peizanted Breizh zo o sevel ivez ouzh ar Mercosur hag ouzh ar fed zo re a reolennoù war o chouk.

• Digresket e vo an niver a studierien 'bar rannoù psiko ha Staps gant an UBO.

• Nullet eo ar yalc'had a 20 000 euro a oa bet raktreset reiñ da Les Zhomnivores gant Rannvro Breizh.

• Prosez an FN: Pemp bloavezh toull-bac'h, 300 000 euro a dell kastiz ha pemp bloaz hep gallout lakaat hec'h anv zo goulennet ouzh Marine Le Pen.

• Taget eo ar frammoù da broduiñ tredan 'ba Ukrena gant lu Russia.

• Dilennadegoù kannaded a vo dalc'het 'ba Republik Iwerzhon warc'hoazh.

• Stade Brestois zo diskennet en 11vet plas ouzh renkadur ar Champion's League!