Marteze a-walc'h ec'h anavezit ar skeudenn-mañ, hini ar jañdarmed o skarzhañ eus ti-kêr Trabrivan ar vanifesterien deuet da stankañ un enklask publik. Honnezh oa bet tennet e kreiz Breizh gant Nikol ha Feliks ar Garreg er bloavezhioù 1970. E-kreiz ar stourm a-enep an adlodennañ. Hennezh a vije kinniget d'ar c'houlz-se evel ur mod da vont war-raok da heul ar « Progrès » evel ma vije lâret. Met war digarez aesaat al labour-douar e oa bet cheñchet da vat dremm ar vro. Un diaporama a oa bet graet en amzer-se gant an daou boltrejer. Niverelaet eo bet hennezh ha nevesaet. Disadorn e Trabrivan e oa bet diskouezet evit ar wezh kentañ, 50 vloaz war-lerc'h an darvoudoù. Un abadenn aozet gant ar gevredigezh Mignoned Nikol ha Feliks ar Garreg, kumun Trabrivan ha Mirdi Breizh. Un digarez d'ar c'hwec'h-ugent a dud a oa aze da zispakañ o eñvorennoù, da lâret o soñj pe da sikour anavezout an dud war ar poltrejoù. Ur gaer a abadenn, hervez Mikael Kouteller, kelenner istor o chom e Trabrivan 20 vloaz zo. Goulennataet e oa bet gant Morgan Large. Un den eus Brieg oa bet enrollet ganti ivez.

Kentañ gwezh e vo diskouezet an diaporama a vo e aoditoriom, e selaouva Mirdi Breizh e Roazhon. Un abadenn libr ha digoust da vont e-barzh.