Hiraat an ehan kerentiezh evit an eil den er c'houplad a zo ur beñveg da vroudañ an ingalded etrezo. Hiriv an deiz e chom 30% deus an tadoù na gemeront ket a ehan ur wezh ganet o c'hrouadur, dreist-holl ar re hag a zo staliet war o c'hont. Adalek an devezh kentañ a viz Gouere 2021 e vo doublet an niver a zevezhioù ehan evit an eil den. Gant Emmanuel Macron oa bet embannet ar sizhun dremenet e c'hello an dud kemer 28 devezh a ehan kerentiezh a-benn nebeut. Brendan a zo bet tad evit ar wezh kentañ un nebeut mizioù 'zo. Lâret a ra deus mikro Tunvezh Gwlagen-Grandjean eo pouezus tre gellet tremen amzer gant e grouadur e mareoù kentañ e vuhez... Diskinnig : Gant al lezenn nevez e teu Bro-C'hall da vezañ e touez ar broioù Europad gant an ehan hirañ, met chom a ra pell war lerc'h broioù an hanternoz 'vel e bro Finland, da skouer, e c'hell an daou gerent kemer 7 mizvezh a ehan kerentiezh. Danevell ar pedopsikiatr Boris Cyrulnik, hag 'n eus hentet ar gouarnamant evit dezhañ sevel e destenn lezenn, a ginnige eñ 9 sizhunvezh a ehan evit an eil den kar. Lakaet vo ar vuzul-se da dalvezout e diabarzh ar raktres lezenn kentañ da argantiñ ar Surentez Sokial. Koustiñ a raio war dro 500 milion a euroioù ouzhpenn bep bloaz d'ar Stad.