Mare an Diskar-Amzer eo mare an av'loù ! Lod a c'heller mirout e pad un nebeut mizvezhioù met lod all a vrein buan. Un doare brav da derc'hel an av'loù eo fardañ chug ganto. Stalioù a-vicher a zo kroget da ginnig d'an dud degas o av'loù dezho, ha mont kuit gant o boutailhoù leuniet gant chug. Tud all a ra pep tra o-unan, evel Clotilde ha Nicolas 'ba Rosporden, peogwir 'neunt ur waskerezh av'loù en o hangar. Pediñ a reont, bep bloaz, o mignoned da zont gant o avaloù evit un devezh, da walc'hiñ, troc'hiñ, malañ, gwaskañ, tommiñ, ha lakaat ar chug e boutailhoù 'barzh ar fin. Disul tremenet e oa bet aozet an devezh, ha bet e oa Tunvezh Gwlagen-Grandjean d'ober un droig eno...