Ur sujed kaset da benn gant Gwenvael Delanoe. Stenn 'walac'h eo ar jeu e Plouha, ba Bro Ouelo. Eno 'zo tri raktres labour-douar braz : div greizenn metanaat hag ur forn da dommañ ur pezh mell savadur tier gwer. 'Pezh 'zo n'eo ket a-du ul lodenn vat eus poblañs ar gumun, a gav dezhi 'zo eus ur vank a zemokratelezh deus perzh dilennidi an ti-kêr 'vit ar raktresoù-se. Da gentañ 'oa bet gouezet 'oa eus seurt ratresoù gant un den, un tamm dre zigouezh, pa oa o pourmen war-warc'houarn er gwinojennoù. 'Oa ket bet graet brud eus an tri raktres-se, ha bremañ e teu da vezañ un dalc'h braz etre an dilennidi, perc'henerien an embregerezhioù labour-douar, hag an amezeien. Deomp da selaou ali un vaouez deus ar vro, enep ar raktres anezhi. Kemer a ra Myriam perzh er gevredigezh Plouha-Endro, hag e sell aketus deus ar pezh a vez graet gant ar c'henstrollad « stop methane Plouha ». Ha start awalac'h an darempredoù etre an enebourien hag ar re 'zo a du ga'r raktresoù braz-se. Kement hag e oa bet cheu dirag ti kêr Plouha bloaz paseet e miz C'hwevrer : bodet 'oa bet enebourien ar raktresoù 'vit reiñ o soñj d'ar guzulierien, ha setu 'n em gavet labourerien douar produktivist ha kannaded kambr al labour douar da vountañ warne, da laerañ o mikro, ha memes da vannañ liv ouzh dremmoù manifesterien 'zo. Ga'n archerien 'oa bet harzet un enebour e fin ar vanifestadeg, evit an abeg 'ma oa gwisket ur maskl gantañ. Kaset an den betek al lezvarn memes tra er miz tremenet, 'lec'h m'oa bet relakset. Un amoug a zo bet kaset ga amezienn ur raktres kreizenn metanaat da lezvarn melestradurel Roazhon, hag un eil 'hell bout graet en devezhioù o tont 'vit an eil kreizenn.