An distro-skol 'zo hiriv, goude vakañsoù an diskar-amzer. Ouzhpenn d'ar vro bezañ enket, o deus bremañ kelennerien ha skolidi da dalañ asambles deus muntr ar c'helenner Samuel Paty, drouklazhet raktal a-raog ar vakañsoù. Sañset oa hiriv neuze an eur distro bezañ daleet da 10e evit an holl vugale, a-benn laoskel amzer d'ar gelennerien en em gavout etrezo da gentañ. Goude-se e oa da vezañ ul lid er porzhioù skol gant ar vugale. Gant ar muzulioù yec'hed nevez, ha gant ar gwalldaol a zo c'hoarvezet e kêr Nice da c'houde, eo cheñchet ar ministr Jean-Michel Blanquer soñj digwener d'abardaez. Dont a raio ar vugale d'ar skol ar mintin-mañ d'an eur normal, ha ne vo aozet e koun Samuel Paty nemet ur vunutenn didrouz da 11e. Un destenn a zo da vezañ lennet d'ar vugale da heul. Erwan ar Berr, rener skolaj Diwan Kemper, a zo deus mikro Tunvezh Gwlagen-Grandjean.