Embannet eo bet ar c'heleier ar beure mañ gant Erwan Blanchard

Sevel ur rouedad etrevroadel war an agroekologiezh!

Setu ar pezh emañ é ober ar c’hevredigezhioù Amar hag an RBS (Réseau Bretagne Solidaire). Ispisializet int an div war ar c’hengred etrevroadel hag an deskadurezh poblek. Ur veaj da Vrazil get peizantezed a zo aozet evit lañsañ ar rouedad. Un emvod evit kempen ar veaj-se a zo bet e-pad an dibenn-sizhun. Aodren Trehin a zo aet da gejañ get ar skipailh e Roc’h-an-Argoed, pe Rochefort-en-Terre e Galleg, e lec’h ma oa an emvod. Selaouomp evit kregiñ Amanda Samarcos, a zo o tont eus ur familh peizanted hep douar e Brazil. Emañ er mare-mañ e servij keodedel gant Reseau Bretagne Solidaire.

46vet Transmusicales 'ba Roazhon

Strolladoù dianv a vez dizoloet er gouel-se dalc'hmat, o tont eus pep korn ar bed. Hag un taol-lañs brav e c'hell bezañ ar festival-mañ evit an arzourien hag arzourezed da c'houde. Setu div arzourez o doa plijet bras da skipailh Radio Breizh e-pad an dibenn-sizhun : Daniela Pes, ur ganerez eus enez Sardeña, ha Verde Prato, ur ganerez euskarad eus Bilbo. Selaouomp da gentañ un tañva eus Daniela Pes, a gan en ur yezh krouet ganti diwar unan eus yezhoù Sardegn, ar Galurezze.

Ha da selaou ouzhpenn 'bar c'heleier:

• Siria: Bachar El Assad zo bet bountet maez gant an HTS

• 11vet nozvezh stourm 'ba Jeorjia ouzh ar gouarnamant a-du Russia

• Nullet eo bet eil tro an dilennadegoù prezidant 'ba Roumania

• Skubet eo bet Breizh gant ar gorventenn Darragh

• Gouennelouriezh: harzhet eo bet ar c'hrogad etre Plouhineg hag AS Menimur

• Kampion ar Bed paddle eo ar brestad Benoit Carpentier

• Anaïs Morichon ha Tony Periou zo kampionidi Breizh cyclo-cross