Kinniget eo bet ar c'heleier get Aodren Trehin

Ur foetadenn e Sant-Brieg evit Diwan

600 den mennet a oa deuet disul da redek ha da vale er Foetadenn, e St-Brieg. Evit ar wezh kentañ eo bet aozet ar redadeg àr-droad-se get kuzul skoazell Diwan, da rastellat argant. Ha graet en deus berzh an darvoud ! Kalz muioc’h a dud evit ‘pezh a oa raksoñjet a oa deuet da ruzañ o votoù e traoñiennoù St-Brieg, peadra da rastellat kalzig a arc’hant. Troiadoù a-bep live a oa : un hentad baleadenn drankil, get skritelloù da dizoloiñ glad St-Brieg, peotramant un droiad da redek 10 km, hag un arall a 19 km. Afer a oa d’ar rederezed ha d’ar redourion esperniañ o startijenn peogwir e pigne hardi an hent e fin tout an droiad... Kaoz a zo dija a aozañ ur Foetadenn arall a-benn ur blez. Sed aze un doare dreist-ordinal, hag efedus, da sevel argant evit Diwan. Met afer en do Skol Diwan St-Brieg kontañ c’hoazh àr nerzh ar gerent hag an dud a youl-vat, peogwir eo dav kavout ar peadra da baeañ 5 post a veze gopret get an ti-kêr betek bremañ.

Ur gêr a vo lâret diouzhtu get Sesil Morvan, mamm ur skoliad, hag àr-lerc’h get Margot Kerioù, skolaerez, ha renerez ar skol.

Ur reportaj bet graet get Gwenvael Delanoe.

N'eo ket c'hoazh jaojabl ar surentez àr velo

Monet get an hent get ar velo a c’hell bout dañjerus mat. Ingal e vez gwallzarvoudoù etre ar re a ya get o velo hag ar re ya get o c’hirri-tan. E 2023, 226 den a yae get o velo zo bet lazhet war an hent. Nevez zo eo bet lakaet àr wel marv un den yaouank e Pariz. Stoket ‘oa bet diouzhton gant un SUV a-ratozh kaer. Gallet a rer mennegiñ c’hoazh marv « L’homme en bleu » e bro Limoges. Deomp da selaou Lomig Danteg, paotr e velo. D’al labour e ya geton bemdez betek kreiz kêr Brest. Ar pezh zo a bouez evitañ a zo bout gwelet àr an hent get ar re a gas un oto ha dre se gwiskañ dilhad lufrus ! Emañ get Erwan Blanchard.

Ha da glevet ivez er c'heleier:

-Keloù ag ar c'hop 29 evit an hin e Azerbaidjan

-Nac'het eo bet get lez-varn Roazhon ar muzulioù bet kemeret get razh maered Aodoù an Arvor a-enep ar stad evit goulenn ur servij yec'hed en holl tiriadoù

-Ur studiadenn a zo bet embannet evit enebiñ diouzh ar c'heverezh etre ar granit ag an estren vro hag ar granit lec'hel