Kinniget eo bet ar c'heleier ar mintin-mañ gant Metig Jakez-Vargas

Heuliadenn war an tu dehoù pellañ e Breizh

Ar sizhun-mañ e kinnigomp deoc’h selaou un heuliadenn atersadennoù diwar-benn an tu dehoù pellañ e Breizh. Strolladoù lec’hel pe strolladoù politikel eus an tu dehoù pellañ a glask kemer ur plas e Breizh, ur vro tuet kentoc’h eus an tu kreiz pe a gleiz. Strategiezhioù disheñvel a vez gant ar faskourien evit desachañ tud ha lakaat war wel o ideologiezh. Peseurt strategiezh, peseurt liammoù o deus ar strolladoù etreze, ha penaos e klask strolladoù all stourm enepte… Setu frapad kentañ hon heuliadenn hiziv.

An Tour Tan, a zo ur strollad faskour staliet e Bro Gwened, a implij kalz ar rouedadoù sokial. Ha c'hoari a reont gant identelezh Breizh. Kinnig a reont Atalieroù pe kentelioù e brezhoneg… Liammoù a zo etre an Tour Tan ha strolladoù politikel an tu dehoù pellañ, implijout a reont burev Reconquête evit o emvodoù da skouer e Gwened. Daoust ma klask ar strollad-se kaout ur skeudenn brav ha yaouank e vez manifestet gante gant strolladoù faskour all e Pariz da skouer, gant ar GUD, « Groupe Union Défense », a zo brudet evit bezañ ur strollad gouennelour ha feuls.

Muioc’h a zisplegadennoù gant un den eus strollad enepfaskour Bro Wened. Cheñchet hon eus e vouezh rak fellout a rae dezhañ bezañ gwarezet.

Arvest nevez Gwennyn

Aï eo fin unan deus Gouelioù pennañ ar bloaz, Gouel Breizh, a oa etre ar 17 hag ar 26 a viz Mae. Un 300 bennak a zarvoudoù a zo bet dalc'het dre ar bed a-bezh evit lidañ pobl Vreizh hag e sevenadur. Gant ar c’huzul rannvro eo aozet ar gouel-mañ. E kreizenn sevenadurel ar Genkiz Sevigneg eo bet degemeret ar ganerez Gwennyn, hag he deus graet ‘berzh, leun chouk e oa ar sal. Aet eo Anton Burel da atersiñ anezhi, un digarez e oa da gaozeal ganti diwar-benn he raktresoù nevez ...

Ha da glevout ivez er c'heleier :

- Ouzhpenn 2000 den a zo marvet e Papouazia 'blamm d'ar riskl-douar digwener

- Resevout a raio Ukrenia skoazell digant bro Spagn

- Marvet zo 45 den en ur c'hamp repuidi e Rafah da heul ur vombezadeg Israelian

- N'eus ket mui eus ar stad a zifrae e Kanaki

- Staget eo plac'hed ar menaj gant un harz-labour e Marseille araok ar c'hoarioù olimpel

An holl reportajoù zo da selaou AZE