Embannet eo ar c'heleier gant Erwan Blanchard

Ar Redadeg en em gavo 'ba Brest fenoz!

O tostaat eus Montroulez hag eus an degouezh emañ galouperien ar Redadeg. Tost 1800 kilometr zo bet lonket dija. War-dro Speied eo en em gavet ar Redadeg da 8e30… A-benn fenoz en em gavo ar Redadeg ‘ba Brest e lec'h m’eo mil c’hortozet gant tud ar vro. Setu ar pezh he deus kontet deomp Trifina Baudu a zo kenurzhierez SKED, ti ar vro bro Brest… Ha ganto zo bet fardet ur programm da lidañ an darvoud. Emañ Trifina Baudu gant Erwan Blanchard.

... En em gavout a raio ar Redadeg warc’hoazh war dro 3e45 ‘ba kreiz-kêr Montroulez. Gallout a rit bevañ an darvoud war-eeun war ho pemp radio e brezhoneg. Adalek 3e30 e vo kinniget un abadenn deoc’h war-eeun eus Montroulez.

Tri ugent mil lenner 'ba festival "Les étonnants voyageurs"

Etre disadorn ha dilun tremenet e oa ar festival Les étonnants voyageurs e Sant-Maloù, tro-dro tri ugent mil den a oa deuet er festival a zo arbennikaet war al lennegezh met ivez ar sinema hag an arvest dre vras. Skrivagnerien deus ar bed a-bezh a oa deuet evit sinañ o levrioù diwezhañ pe kaozeal 'ba prezegennoù a veze dalc’het e Palez an Donvor hag en un nebeud lec’hioù er gêr gloz. E-mesk ar skrivagnerien etrebroadel e oa ar skrivagner iwerzhonad Colum McCann, an amerikanad David Vann hag ar bolonadez Olga Tokarczuk, priz nobel al Lennegezh . Skrivagnerien deus ar bed a-bezh ha neuze deus Breizh ivez ‘giz Alan Stivell a oa deuet da sinañ e emvuhezskrid "Stivell par Alan", ha Denez Prigent a oa war blas ivez. Deuet e oa evit sinañ e levr nevez "Gwerz Denez" embannet gant Ouest France, met ivez evit ober prezegennoù … Selaouomp anezhañ diouzhtu … Emañ gant Anton Burel.

Gallout a rit selaou ar reportajoù amañ

Ha da selaou er c'heleier:

- Harzh an tan e Gaza: hudu e vo studiet gant lez-varn etrevroadel ar justis goulenn Afrika ar Su.

- N'emañ ket en soñj Macron dilezel e raktres kemm ar c'horpus votiñ

- Manifestadegoù ouzh "Le choc des savoirs" warc'hoazh 'ba kêrioù Breizh

- Stéphane Le Mignan n'eo ket gourdoner US Konk-Kerne ken