Gourenerien ha gourenerezed gwellañ ar vro en em gavo ‘ba Gwengamp ! Dalc’het ‘vo ‘benn disul darvoud pouezhusañ al lajad 2024 : Kampionad Breizh. Aozet eo ar genstrivadeg gant skol gouren Louergad-Gwengamp. Evit lansañ an devezh e vo pouezhet ar sportourien adalek 11e ha war lerc’h ‘vo dalc’het al lid touiñ ‘rank an holl kemer perzh ennañ. Ar c’hrogadoù kentañ zo programmet da 12e30. Un darvoud eus ar c’hentañ eo kampionad Breizh Gouren evel ‘pezh ‘neus displeget Anaelle Le Piolet deomp. Un abadenn ispisial war ar c’hampionad war eeun eus sal Pierre-Yvon Tremel ‘Gwengamp ‘vo kinniget deoc’h war ho pemp radio e brezhoneg ‘benn disul. Skignet e vo etre 1e30 ha 2e30. Kampionad Breizh zo important mat evit an holl ‘neunt gounezet o flas da geñver ar c’hampionadoù lec’hel ‘oa bet dalc’het pempzektez zo. Selaouomp Anaelle Le Piolet, gourenerez anezhi hag ezelez eus skol Louergat-Gwengamp. Emañ gant Erwan Blanchard.