Kinniget eo bet an abadenn geleier gant Erwan Blanchard

Ha ma 'teufe medisined eus Kuba da labourat 'ba ospitalioù ar vro?

Bec’h zo war ar servijoù yec’hed er vro war digarez e vank tud da labourat en ospitalioù, ispisial e Aodoù-an-Arvor. Met gallout a rafe an diouer a dud bezañ diskoulmet buan a-walc’h. Penaos ‘ta ? O tegemer medesined eus Kuba, eme lod. Da goulz ar C’hovid-19 dija e oa bet ur c’henlabour etre ar Frañs ha Republik ar C’haraib da gas labourerien eus Kuba d’an Antilhez. Ha digwener, souezhusat tra !, e oa bet pedet Otto Vaillant, kannad Kuba, da zont da Wengamp gant Vincent Le Meaux, prezidant tolpad kêrioù Gwengamp-Pempoull. Renablet e oa bet an ezhommoù tud e pep servij gant sikour sindikadoù an ospital. Da heul e oa bet graet un emvod kelaouiñ war an ton bras.

Ur reportaj kaset gant Tomaz Laken.

Stanket eo bet lise an Elorn gant 1000 lisead!

Brud zo ‘ba Landerne ! Tro dro da lise an Elorn da nebeutañ. Dilun e oa stanket ar skol gant 1000 a liseidi. Un tamm nebeutoc'h anezho a oa 'ba tu raok al lise dec'h . N’emaint ket a-du gant an diviz da nullañ al lajadoù kentelioù gant strolladoù daouhenteret. Ur c'holl a 44 eurvezh en holl a c'hallfe bout gant al lise. Savet e oa ar gelennerien ouzh an diviz se ar sizhun dremenet dija. Lakaat da fallaat kondissionoù deskiñ al liseidi e vefe ma vefe kadarnaet an diviz se.  Selaouomp Herve Maubian, kelenner 'ba lise an Elorn.

Ur pennad-kaoz gant Erwan Blanchard.

Ha da glevout ouzhpenn 'bar c'heleier:

- Hag ul lezenn a vo savet evit anavezout perzh ar Stad C'hall 'ba kudenn al louzoù Klordekon 'ban Antilhez.

- Klask zo dilojañ zadisted zo ouzh ar gourhent A69 etre Tolosa ha Castres.

- Gwerzhañ armoù da Izrael: setu perzh Stad C'hall 'bar brezel hervez kannaded zo

- Dav eo sevel ul lezenn nevez evit pardoniñ dizalc'hourien Katalunya

- Dindan daou viz eo kresket ar baourentez 'ba Arjentina Javier Milei!

- Gant un trec'h war Merignac e vo Brest Breizh Hand e plas 1tañ!

Selaouit ar reportajoù en o fezh amañ