Disul 2 a viz Here e vo digoret an dekvet Champ d'expression. Un darvoud gant ar gevredigezh La Fourmi-e a ginnig pediñ arzourien hag arzourezed da dremen un pennad amzer war menajoù eus kreiz Breizh. Ha dav d'ar re-seoù sevel un oberenn war blas. Deomp da Gerleo, ba Plougernevel, da feurm ar Buis Sonnant, e-lec'h ma vez savet saout brizh-du ha moc'h deus ar vro. Eno zo bet kejadenn etre Marion Henri hag he c'henlabourerien hag an arzourien Denis Colin ha Julien Lannou. Gantañ hemañ zo bet savet un iñstalasion, ur stalerezh, gant danvez diwar ar maez ha da heul...un istor hag ur preder kinniget d'an dud a dey da sevel o fri... Pennad-kaoz gant Julien Lannou ha Marion Henri, gant Tomaz Laken.

Adalek disul goude kreisteiz, ha goude-se bep wikend betek fin ar miz, e c'hallo an dud dont da welet evit mann an oberennoù krouet gant 7 arzour war 6 menaj ba Plougernevel, Rostrenn ha Groñvel. Un digarez da gonto gant arzourien ha menajerien war un dro...