Evit ar wezh kentañ eo bet skipailh gwazed basket Kemper bet betek gourfenn an tournamant. Dibaoe penn kentañ ar sezon n'o deus ket Maouted Kemper gellet c'hoari krogad ebet er c'hampionad basket ProB. Kontamet oa lod izili ar skipailh gant ar virus kurunenn e miz Here. Un distro brav o deus graet padal e miz Du gant al Leader's Cup. N'eo ket an tournamant-se un degouezh braz er c'hampionad, boaz. Argantaet gant Disney, implijet vez gant ar skipailhoù evit leuniañ o deiziater ha kaout krogadoù ofisiel da c'hoari. Met kemeret 'n eus an tournamant ur plas kalz brasoc'h ar bloaz-mañ gant ar c'hleñved-red, a lâr Roland Martot domp. Emañ harper Maouted Kemper deus mikro Tunvezh Gwlagen-Grandjean. Gout a ouio hiriv skipailhad Maouted Kemper ma c'hello c'hoari krogadoù ar c'hampionad basket ProB kerkent e miz Kerzu. Harzet oa bet ar c'hampionad, diwar c'houl ar c'hleuboù, hag a zo war goll pa tegemeront krogadoù hep arvester ebet da baeañ plasoù. Dimeurzh 'n oe embannet Emmanuel Macron prezidant ar Republik ne vo ket degemeret harperien er salioù da arvestiñ ar c'hrogadoù evit c'hoazh. Bremañ eo da Lig Broadel ar Basket da zivizout ma vo loc'het en dro gant ar c'hampionad e miz Kerzu daoust da se pe ne vo ket.