Hiriv er Vodadeg Vroadel, goude ar prantad goulennoù savet digant ar gouarnamant, e vo votet gant ar gannaded war ar raktres lezenn war ar Surentez Hollek. Ar sizhun dremenet e voe lennadeg kentañ an destenn er Vodadeg. Ha dirgwener da noz oa bet votet ar pennad 24 outi, ar pennad-se hag a sav enepstañ enebiezh ar gazetennerien, dilennidi an tu kleiz, kevredigezhioù difenn giwrioù Bugel-den evel an LDH, Difennerez ar Gwirioù Claire Hedon, pe c'hoazh keodedourien a bep seurt, nec'het gant an dro ma kemer an traoù da geñver ar gwirioù e Frañs. Kastizet vo gant ar pennad-se an dud hag a skigno skeudennoù deus an archerien o klask ober droug dezho. Kontrol d'ar pezh a voe bet diskleriet gant Ministr an Diabarzh Jerald Darmanin, ne vo ket difennet ober skeudennoù war ar prim deus doareoù ar boliserien hag ar jañdarmidi en o labour. Mez ar riskl a zo, ma tegaso kontrollerezh, deus perzh an archerien, met ivez deus perzh ar gazetennerien o-unan. Setu testenni ur gazetennerez deus ti Frañs3, Muriel ar Morvan, o skeudenniñ ar riskl-se. Manifestet e oa disadorn e Brest gant Muriel ar Morvan ha muioc'h eget mil den all, da vont enep ar raktres lezenn-se. Aonet int lâr yall ar seurt degouezhioù war liesaat gant ar c'hinnig lezenn war ar surentez hollek. Rebechet vez d'al lezenn-se ouzhpenn an dra-se gwashaat an disfi a zo braz dija deus perzh ar boblañs da geñver nerzhioù an urzh, oc'h ober un diforc'hidigezh a wir el lezenn, evit an archerien. Evit difennerezh ar gwirioù Claire Hedon, ouzhpenn bezañ dañjerus evit ar frankiz kazetenniñ, ne selvij ket ar pennad-se da netra, pa vez kavet testennoù lezenn o kastizañ an dud a ra fallimplij deus ar skeudennoù er C'hod Kastizel.