Achu eo forum bedel an ekonomiezh 'ba Davos e bro Suis, digwener d'abardaez. Bodet 'zo bet darn eus penn-rennerien an embregerezhioù bras ha deus kannaded goarnamantoù ar bed-a-bezh, eno. Diwar-benn a bep seurt sujedoù ekonomikel 'oa bet lakaet ar gaoz : stad ar c'hresk ekonomikel er bed, implij ar re yaouank e Europa pe c'hoazh an taosioù da lakaat war embregerezhioù an niverel. Hag evel-just emañ e touez ar sujedoù-pennañ hini an hin... Met n'eus ket bet kinniget diskoulmoù gwir hervezh ar strolladoù ekologour 'vel Greenpeace pe ar vanifesterienn enepkapitalour 'oa dirag dorioù salioù Davos. Ha just 'walc'h... Klask diskoulmoù d'ar c'hudennoù sokial ha da re an endro, setu ar pal o doa aozerien ur forum all d'ar memes koulz : hini Pleskob, 'ba Bro Wened. Tro dro 40 kevredigezh eus ar vro ha pelloc'h 'oa deuet 'pad ar fin ar-zhun 'vit eskemm ga an arvesterien. Kristen Kloastr a zo stourmer a-enep an nukleel. Spered Forum lec'hel Pleskob 'vo displeget gantañ doc'h mikro Gwenvael Delanoe. Evit an dekvet 'gwech 'oa aozet forum sokial lec'hel Pleskob. Ha hervez an aozerien 'vez tro dro dek darvoud seurt-se ha tri-ugent bep bloaz 'ba Breizh ha Bro C'hall.