En un doare resis, zo bet goulennet digant ar gouarnamant da gadarnaat un Emglev nevez savet gant an ONU da zifenn an armoù Nukleel. An emglev-se, graet TIAN deuzoutañ evit Traité d'Interdiction des Armes Nucleaires, a zo bet votet e 2017 gant 122 vro, ar pep brasañ outo broioù Amerika ar C'hreisteiz hag Afrika. Bro C'hall, asambles gant ar broioù all o terc'hel armoù nukleel, a zo chomet hep kemer perzh er votadeg-se. Evit ma vefe lakaet e plas an emglev TIAN da vat, eo ret bout kadarnaet gant gouarnamantoù pe parlamantoù 50 bro, 'pezh 'zo graet gant 19 bro betekgen. Ha n'emañ ket bro C'hall en o zouezh evel just. E 9 lec'h arouezhus e bro C'hall 'oa aozet un emgav dec'h evit lâret groñs da vro C'hall kadarnaat d'he dro an emglev nevez-se. Emgav 'oa roet neuze un tammig e pep lec'h : e kreizennoù enklask war an nukleel, e bonoù nij, hag unan 'oa 'ba Breizh dirag bon-spluj an Enez-Hir war ledenez Kraon. Youen Jardin, Annaig Riwall, ha Yann Wafflart a gemere perzh er vanifestadeg. Ur reportaj gant Tunvezh W/Gwlagen-Grandjean.