'Benn digwener e loc'ho an dekvet redadeg evit ar brezhoneg. Monet a ray a Gemper da Blougerne ar blez-mañ. Redet e vo e-pad 8 devezh diehan noz ha deiz. 1800 kilometrad en holl, evit ar brezhoneg hag ar blijadur. E Bro an Oriant eo bet gwerzhet an holl gilometradoù mes passabl a chom da breniñ e Breizh c'hoazh, dreist-holl er kreiz ar vro. Tristan Nedeleg a zo perzh er skipailhad aoziñ e kornad an Oriant. 'Benn dimerc'her ketañ e vo ar rederion du-se hag e-pad an deiz, ha ne vo ket e-pad an noz èl ma oa bet ar bleadoù paset. Gouiamp pelloc'h getoñ doc'h mikro Yaelle ar Mouel.