A hed ar fin ar sizhun, e oa aozet gant Breizh Bev ur prantad braz niveriñ laboused ar jardinoù. Ar gevredigezh naturalisted a vez oc'h ober an dra-se bep goañvez dibaoe 2011. Un nebeut reolennoù a zo, neuze, evit ma c'hello an disoc'hoù bezañ implijet en un doare skiantel. Da gentañ vez dav dibap un dachennad resis, ha da eil kemer un eurvezh rik evit en ober. Met dreist holl vez dav teurel evezh braz da chom hep kontañ div wezh ar memes labous. Da lâret eo, ma vez gwelet teir gwezh ur boc'h-ruzig o tremen, e vez kontet ur boc'h-ruzig nemetken, ha n'eo ket tri. Ur wezh niveret laboused ar jardin e vez kaset an disoc'hoù da Vreizh Bev dre an ti-post pe dre internet. Savet vo ur studi braz gant ar gevredigezh a-benn nebeut, evit embanniñ an disoc'hoù. Bloaz paseet zo bet 3600 den o kemer perzh a hed an daou zevezh, bet kontet 116 645 labous ganto, a 116 spesad disheñvel. Axel Landeau a zo bet o kas ar bouelladenn-mañ en e jardin, e Plozevet, war vord ar mor. N'eo ket bet ken aezet-se dezhañ, 'giz ma vo gwelet. Penaos ober da skouer, ma ne vezer ket gouest da anavezout al laboused a vez gwelet, er mod-se ? Respontiñ a ra da Dunvezh Wlagen-Grandjean